|

Туулыг эрүүл мэндэд аюултай голоор нэрлэжээ

bohir

Монголын Туул, Индонезийн Ужун, Тайландын зүүн өмнөд хэсгийн гол гурвыг хүний эрүүл мэндэд заналхийлж буй гурван голоор “Томсон Ройтерс”-ийн сан нэрлэснийг “Ройтерс” дамжуулжээ.

Энд нэрлэгдсэн гурван улс усны чанар, болзошгүй эрсдэл болон иргэдийн мэдэх ёстой мэдээллээр дутмаг байдаг гэж дурдсан байна.

Индонезийн дээрх голоос сам хорхойн аж ахуй эрхлэгчид аж амьдралаа залгуулдаг бол Тайландын зүүн өмнөдөд хими, газрын тос боловсруулах үйлдвэр, нүүрсний станц төвлөрдөг нь бохирдлын гол шалтгаан ажээ.

Хэдийгээр бохирдсон усыг унданд хэрэглэж буй нь тодорхой ч энэ талын мэдээллийг иргэдэд ил тод өгдөггүй учраас дээрх орны иргэд эрүүл ахуйн шаардлага хангаагүй ус хэрэглэж, эрүүл мэндээрээ хохирсоор байна гэжээ.

Туул голын бохирдлын гол хүчин зүйлүүд мэдээж цэвэрлэх байгууламж, арьс ширний үйлдвэрүүдийн бохир ус, хог хаягдал. МХЕГ-аас шинжилж дүгнэснээр Сонгинын гүүрнээс доошх усыг унданд хэрэглэх боломжгүй хэмээн дүгнэлт гарсан байдаг.

Арьс ширний үйлдвэрүүдийг хотоос гаргах асуудал сүүлийн жилүүдийн мөнхийн сэдэв болсон ч өнөө хэр шийдэгдээгүй байна. Хамгийн сүүлийн мэдээллээр газрын асуудлаа шийдээгүй, хөрөнгө оруулалтгүй гэсэн шалтгаанаар арьс ширний үйлдвэрүүдийн асуудал зогсчээ.

Нийслэлийг ундны усаар хангадаг дөрвөн том эх үүсвэрийн 174 гүний худаг Туул гол дагуу байршдаг. Хэдийгээр Туулын бохирдол гүний усандаа нөлөөлөөгүй гэдэг ч удаан хугацааны бохирдол хөрсөндөө нэвчсэн байх магадлалтай гэдэг.

Мөн нийслэлчүүд хлороор ариутгасан ус уудаг. Хлорын хэмжээ хэтэрвэл хүний эрүүл мэндэд хортой гэсэн дүгнэлт ч гарсан байдаг.

Г.Гэрэл

gereg.mn

*

Сүүлд нэмэгдсэн сэтгэгдэл