Нийслэлийн Засаг дарга Киргиз Улсын Ерөнхийлөгч асан хатагтай Роза Отунбаеваг хүлээн авч уулзлаа

Нийслэлийн Засаг дарга бөгөөд Улаанбаатар хотын Захирагч Э.Бат-Үүл Бүгд Найрамдах  Киргиз Улсын Ерөнхийлөгч асан хатагтай Роза Отунбаеваг хүлээн авч уулзлаа. Уулзалтаар хоёр орны хамтын ажиллагаа, цаашдын хөгжлийн талаар санал солилцов.
Уулзалтын эхэнд нийслэлийн Засаг дарга бөгөөд Улаанбаатар хотын Захирагч Э.Бат-Үүл   “Монгол Улсад анхны Ардчилсан чөлөөт сонгууль болсон түүхэн үйл явдлын 25 жилийн ойн олон улсын хүндэтгэлийн хуралд таныг оролцсонд таатай байна. Баяр сайхан болж өндөрлөлөө. Улаанбаатар хотод бүтээн байгуулалтын олон ажил өрнөж байна. Бид УИХ – аар “Улаанбаатар хотыг 2020 он хүртэл хөгжүүлэх ерөнхий төлөвлөгөөний толотгол, 2030 он хүртэл хөгжүүлэх хөгжлийн чиг хандлагийн баримт бичиг” – ийг батлуулсан. Тус төлөвлөгөөгөөр нилээн прагматик зорилт тавин ажиллаж байгаа. Танай улсын хөрөнгө оруулагчидтай хамтарч ажиллах сонирхолтой байна. Ирэх жилээс бид хөрөнгө оруулагчдад зориулсан оффис бэлдэхээр төлөвлөж байгаа юм. Бидэнд хөгжлийн түлхүүр илүү ойр байгаа учир хамтран ажиллахдаа баяртай байх болно” гэлээ.

Харин  Бүгд Найрамдах  Киргиз Улсын ерөнхийлөгч асан хатагтай Роза Отунбаева Бид Улаанбаатар хоттой хамтран ажиллахдаа таатай байх болно гэдгээ илэрхийлж, Киргизийн хөрөнгө оруулагчид нийслэлийн бүтээн байгуулалтын ажилд дэмжлэг үзүүлж ажиллахад татгалзах зүйлгүй гэдгээ уламжиллаа гэж Нийслэлийн ЗДТГ – ын Хэвлэл мэдээлэл, олон нийттэй харилцах хэлтсээс мэдээллээ.